Saattuni timersoqatigiiffik Amaroq KNI A/S-ilu isumaqatigiissusiortut

KNI A/S-p ukiorpassuarni timersorneq tapersersortuarpaa. 1. oktober 2018 atuutilersumik ukiunilu marlunni ingerlasussamik KNI-p Saattuni timersoqatigiiffik AMAROQ aningaasaliisarnissamik isumaqatigiissuteqarfigivaa.

“Nuannaarutigaara nunaqarfinnguatsinni timersoqatigiiffipput KNI-mit aningaasaliiffigineqartalermat. Timersornermik ilaasortatta ingerlatsinissamut piumassuseqarnerannut tamanna iluaqutaassasoq qularutiginngilara. Immitsinnut upperinerulissaagut, siullermillu Uummannap eqqaani unammisaqattaartarnerni angummannerunissatsinnut tamanna iluaqutaassaaq. Aasaq manna Uummannami ivigaasaaqqanik arsaattarfik atuutilerpoq, tassanilu Uummannap eqqaamiuisa isikkamik arsarlutik unammiuaarneranni angusarissaareerpugut.” Amaroq-p siulittaasua Apollo Mathiassen taamat oqarpoq.

“Saattut avannaani aalisarfissuuvoq, eqeersimaartunik aalisartulik, tamannalu nunaqarfimmi ingerlatatsinnut (pisiniarfikikummatissaarniarfik) pitsaasumik sunniuteqarluarpoq. Saattormiut timersornermik aallussilluartuupput, soorlu Avannaata Qimussersuaqartarnerini pitsaanernut akuujuartuullutik, meeqqat atuarfiat ingerlalluarpoq, meeqqallu inuusuttullu timersornermut innersuunneqartuarlutik.” KNI-p pisortaanera Peter Grønvold Samuelsen oqarpoq.