Periusissiorluarnerup sulisullu pikkorissut kingumut KNI angusarissaarteqqippaat

Ukioq naatsorsuuteqarfiusoq 2016/17 ukiuuvoq KNI-mut ineriartorfioqqittoq angusarissaarfiusorlu, suliffeqarfissuup periusissiaminik siunniussaqarluni anguniagaqarneranut naapertuuttumik. Akileraarutit suli ilanngaatigineqannginneranni 103 mio. DKK-nik sinneqartoornermigut ineriartorneq pitsaasoq 2013/2014-mi aallartinneqartoq allanngortinnagu suliffeqarfissuup taamaasilluni ingerlateqqippaa.

Ukiumi angusat

Ukioq naatsorsuiffiusoq 2016/17 aammaartumik nutaanik pissanganartunik unamminartunillu suliaqarfiuvoq. Periusissiaq "KNI 2016-ip tungaanut" naammassineqarpoq, periusissiarlu nutaaq KILLINGUSAAQ aallartinneqarluni.

KNI-p nutaaliaanerusumik ingerlanneqarnissaani ilungersuutiginninnermi nioqquteqarluni ingerlatsivik tunngaviulluinnarsimavoq. Pisisartunik qitiutitsinissamik “kalaallit inuunerannik ilorlermik” pingaartitsillunilu ataqqinninnermik tunngaveqartumik suliffeqarfimmik ingerlatsinissaq pingaartilluinnarneqarput. Kingumut nioqqutissanik pilersuineq angusarissaarfiuvoq, nassiussalerineq, nioqqutissanik sorlernik salliutitsinissap sulisunillu piginnaanngorsaanerup malitsigisaanik. Nioq-qutissanik pilersuineq DKK 38 mio. –nik sinneqartoorfiuvoq, ukiup siualini sinneqartoorutit DKK 34 mio.-iusimallutik.

Ikummatissanik pilersuinermi ingerlatsivik Polaroil DKK 65 mio.-nik sinneqartoorfiuvoq, ukiup siuliani DKK 64 mio.-nik sinneqartoorfiusimalluni. Akileraarut ilanngaatigereerlugu angusat DKK 71 mio.-iupput. Egenkapital DKK 1.061 mio.-iuvoq, ukiup siuliani DKK 787 mio.-iusimallutik. Taamaalilluni naqissuserneqarpoq KNI suliffeqarfissuusoq aningaasatigut inissisimalluartoq.

Aserfallatsaaliugassatigut kinguaattoorutit

Suliffeqarfissuup aningaasarissaarnissaa pingaaruteqarluinnarpoq sanaartukkat pisoqalisut aser-fallatsaaliortuarneqarnissaannut akissaqassagaanni; tamannalu Pilersuisoq Polaroil-iluunniit eq-qarsaatigalugu atuuppoq.

Nioqqutissanik pilersuinerup iluani sanaartukkat 400-nit amerlanerusut, pisiniarfiit quersuillu eq-qarsaatigineqarput, taakkulu ilarpassui nalitsinnut naleqqukkunnaarsimapput. Aserfallatsaaliugassatigut kinguaattoorutit DKK 300 mio.-inut nalilerneqarput. Ikummatissamik pilersuinerup iluani ikummatissaasivissuit aserfallatsaaliorneqarnissaannut kinguaattoorutit DKK 190 mio.-inut tagginneqarput. Tamannalu ukiualuit matuma siornatigut sanilliullugu misinnartumik appariarpoq, tassami Polaroil-ip ikummatissaasivissui ukiut arlallit ingerlanerini siunnerfeqarluartumik aserfallatsaaliorneqarsimammata. Polaroil Nunarput tamakkerlugu sumiiffinni 71-ini ikummatissaasiveqarpoq.

Suliffeqarfissuup aserfallatsaaliuinissamik kinguaattoorutit annikillisikkusullugit aningaasarpassuit sanaartornermut ukiut kingulliit atorpai. 2016/17-imi sanaartornermut DKK 102 mio.-it atorneqarput, ukioq mannalu sanaartugassanut DKK 130 mio.-it immikkoortinneqarsimapput.

Sinneqartooruteqarnersiutit akileraarutillu

KNI-p piginnittui – Namminersorlutik Oqartussat – isumaqatigiissuteqarfigalugit sinneqartoorutit ilaat DKK 20 mio.-it piginnittunut sinneqartooruteqarnersiutisiassatut immikkoortinneqarput.

Ukiumi naatsorsuuteqarfiusumi 2016/17-imi KNI sulisut akileraarutaat DKK 80 mio.-it pisortanut utertippaat, kiisalu selskabsskat DKK 25 mio.-it akilerlugit.

Piffissami 2008-miit 2016 ilanngullugu KNI DKK 351 mio-it kiffartuussinissamut tunngatillugu Nam-minersorlutik Oqartussanit pissarsiarisimavai, piffissalli taassumarpiaap ingerlanerani KNI-p Nam-minersorlutik Oqartussanut kommuninullu DKK 828,1 mio-it utertissimavai. Allatut oqaatigalugu piffissap tamatuma ingerlanerani KNI kiffartuussisussaatitaanermut atatillugu pisortanit pissarsiat ilanngaatigereerlugit DKK 476,6 mio.-nik inuiaqatigiit karsiinut utertitsisimavoq, sinneqartoorutisiatigut, suliffeqarfiup sulisullu akileraarutaasigut.

Taqqissuut – KNI-p sulisuminik piginnaanngorsaanera

KNI ukiumi naatsorsuuteqarfiusup 2016/17-p naanerani 934-inik sulisoqarpoq. Ulloq naallugu su-liffinngortissagaanni 760-it KNI-mi sulisorineqarlutik. Taamaalilluni KNI Kalaallit Nunaanni sulias-saqartitsinerpaat akornanniippoq. Taqqissuut aqqutigalugu kingumut ukiup kingulliup ingerlanerani KNI sulisuminik annertuumik piginnaanngorsaanermik ingerlataqarpoq.

Suliniutit malunnarnerpaartaraat Niuertunngorniarneqrup pilersinneqarnera, 2016-imi aallartinneqartoq. Taamaaqataanik Ikummatissaasivilerisunngorniarneq aallartissallugu maanna piareersarneqarpoq.

KNI ukiumut DKK 12 mio.-nik sulisuminik piginnaanngorsaanermut atortarpai.

KNI ullumikkut 50-nik ilinniartoqarpoq. Pisiniarfimmiunngorniat niuernermik ilinniarfinni ilinniakkaminnik naammassinnittartut ilaat KNI-mi suliffeqalersarput.  

Inuiaqatigiinni akisussaaqataaneq

KNI suliffeqarfissuartut inuiaqatigiinni akisussaaqataassusermik takutitsiuarsimavoq, aamma oqaaseq CSR Nunatsinnut takkutinngikkallarmalli. KNI timersornermut inuiaqatigiinnilu tapersersortarialittut suliniutinut aningaasaliiginnartanngilaq, aammattaarli piffissami kingullermi aningaasanik nuna tamakkerlugu katersuiniartoqartarnerani KNI pitsaasumik takutitsisarpoq, soorlu kingullermik upernaaq martsimi Nakuusa katersuiniartitsimmat KNI suleqatinilu katillugit DKK 322.000,-nik katersueqataammata.

Sulisunut, pisisartunut suleqatinullu qujanaq

KNI-p siulersuisui pisortaalu KNI-mi sulisunut suleqatinullu, minnerunngitsumillu pisisartunut qujapput, ilissiuvormi angusamik kusanartumik piviusunngortitsisut.

Annertunerusumik paasisaqarusukkaanni pisortaaneq Peter Grønvold Samuelsen attavigineqarsinnaavoq, mobil +299 55 37 03 atorlugu.

____________________________________

• KNI A/S-ip ukiumoortumik naatsorsuusiorfigisarpaa 1.april – 31. marts.
• KNI A/S ukiumoortumik ataatsimeersuassaaq 16. august 2017.