KNI ukiup affaani siullermi angusarissaarpoq

Ukiumi naatsorsuuteqarfiusumi 2015/16 ukiup affaani siullermi KNI naatsorsuutimigut DKK 57,4 mio.-nik – akileraarut sioqqullugu – sinneqartoorpoq, ukiup siuliani ukiup affaani angusat DKK 46,7 mio.-iusimallutik.

Ukiup affaani siullermi angusaq nuannaajallannartuuvoq tamanna tunngavigalugu ilimanarsimmat ukiumi naatsorsuuteqarfiusumi ukioq tamakkerlugu 100 mio. kr.-nik sinneqartooruteqarnissaq siunniunneqareersoq piviusunngortinneqarsinnaalerunarmat. Taamaalillunilu aamma sanaartugassatigut iluarsaatassarpassuit nioqqutissanik ikummatissanillu pilersuinerup iluani annikillisinneqarsinnaalissammata.

Ukiup siuliani ukiup affaani siullermi angusanut sanilliullugu angusat 10,7 mio. kr.-nik pitsanngo-riartinneqarneri pissuteqarpoq nioqqutissanik ikummatissanillu pilersuinermi angusat pitsanngo-riartinneqarnerinit. Pitsanngoriaat nioqqutissanik pilersuinermi 6,9 mio. kr.-iuvoq, ikummatissanillu pilersuinermi pitsanngoriaat 4,3 mio. kr.-iulluni.

KNI-mi angusat pitsanngoriartorneri pissuteqarput KNI 2016-ip tungaanut periusissiaani siunnerfiit piviusunngortiterneqarnerannit, kiisalu aningaasartuutinik aqutsilluartoqarneranit aningaasartuutikillisaasoqarneranillu. Illuutit atorunnaartut aamma tunineqarsimapput, taamaalillunilu ingerlatsinermi nalikilliliinerit aamma sipaarutigineqarsimallutik.

Aningaasartuutinik sukumiilluinnartumik aqutsilluartoqarneratigut suleriutsinillu nutarterisoqarneratigut suliffeqarfissuarmi aningaasartuutit ukiup affaani siullermi ukiup siuliani 2014/15-imi 198 mio. kr.-iu-simagaluartut 195,6 mio. kr.-inut appariartinneqarsimapput. Aningaasartuutikinnerulissutigineqartut ingerlatsinermi aningaasartuutiniipput, soorlu avataaniit siunnersortinik atuineq assigisaallu.

Ukiumi naatsorsuuteqarfiusumi 2014/15-ip ukiup affaani siullermi kaaviiaartitat katillugit DKK 1.217 mio.-iusimapput, ukiup siuliani ukiup affaanut sanilliullugit 44 mio. kr.-nik ikileriarlutik.

Taakkunannga DKK 650 mio.-it nioqqutissanik pilersuinermi kaaviiaartinneqarput, DKK 560 mio.-illu ikummatissamik pilersuinerminngaaneerlutik. Nioqqutissanik pilersuinermi kaaviiaartitat 1,1 %-imik qaffariarput, ikummatissanilli pilersuinermi kaaviiaartitat 7,7 %-imik appariarlutik.

Pilersuisup pisiniarfiini siuariartoqarpoq, KNI Engros-mili ingerlatat 2,8 %-mik kinguariarfiusimallutik.

Ingammik Pilersuisoq eqqarsaatigalugu sinneqartooruteqartitseqqileraluarneq ukiuni aggersuni ammut aallaqqittussaasoq siumoortumik ilimagineqareerpoq, tassami nunaqarfinni illoqarfinnilu isorliunerusuni innuttaasut ikiliartorput, aserfallatsaaliugassat kinguaattoorutit millionillit untritillinnik arlaqartunik akeqartussat isumaginiarneqartussaapput, kiisalu tamakku qaavisigut piginnittut imminnut agguagarsisinneqartarnerat kiffartuussisussaatitaanermut isumaqatigiissummut akiliutaagaluartumut annikillisaavoq.

Annerusumik paasisaqarniaruit pisortaaneq Peter Grønvold Samuelsen saaffigisinnaavat, mobil normu +299 55 37 03 atorlugu.

Immikkut malugisariaqartut: KNI A/S-ip naatsorsuutai ingerlasarput 1. april-imiit 31. marts-ip tungaanut. KNI A/S suliffeqarfissuuvoq nioqqutissanik pilersuinermik (Pilersuisoq), ikummatissanik pilersuinermik (Polaroil), KNI Engros, Duty Free, Wepshop (Pisisa), kiisalu savaaqqanik toqoraavik Neqi A/S-imik, ingerlataqarfiusoq. KNI nuna tamakkerlugu 1.000 miss. sulisoqarpoq, illoqarfinni nunaqarfinnilu 66-ni pisiniarfeqarluni, illoqarfinni nunaqarfinnilu 69-ni ikummatissaasiveqarluni, Sisimiuni qitiusumik allaffeqarfeqarluni, illoqarfinni arlalinni quersuaqarfeqarluni, kiisalu Narsami savaaqqanik toqoraaviuteqarluni. KNI-p pisiniarfeqarnermut immikkoortortaa Pilersuisoq pisiniarfinnik ingerlatsinermi saniatigut suliffeqarfinnik allanik isumaqatigiissuteqarfigineqarluni nunaqarfinni ilaatigut makkuninnga isumaginnittuuvoq: Qulimiguulinnik mitsitsisartuulluni, talittarfinnik nakkutiginnittuulluni, aningaaseriveqarnikkut kiffartuussisuulluni, allakkerinermik nassiussalerinermillu isumaginnittuulluni, angalaniartunut billetsisisarfiulluni, kiisalu Polaroil-ip ikummatissaasiviinik ulluinnarni ingerlatsisuulluni.