Ataqqinartorsuup Dronningip nersornaasiuttagaanik Fortjenstmedalje-mik sølviusumik saqqarmiuliineq

Ukiorpassuarni KGH/KNI-mi sulisuusimasoq Lars Clasen tallimanngornermi 30. oktober 2015 Ilulissani Hotel Arctic-imi nalliuttorsiualaartoqarnerani ataqqinartorsuup Dronningip nersornaasiuttagaanik saq-qarmiulerneqarpoq.

KNI-mi pisortaaneq Peter Grønvold Samuelsen KNI-mi siulittaasoq Niels Thomsen peqatigalugu KNI-mi ukiorpassuarni sulisuusimasup Lars Clasen-ip soraarninngorneranut atatillugu ilaqutaanut suleqataanullu Ilulissani nalliuttorsiualaarnartumik ilasseqatigiissitsipput.

Lars Clasen KGH-mi KNI-milu ukiuni 50-ni affarmilu sulereerluni arfininngormat 31. oktober 2015 soraarninngornera iluatsillugu ukiuni 50-ini sulisimanera malunnartinneqarpoq.

Soraarninngornissi tikillugu Lars Clasen Ilulissani quersuarmi sulisuuvoq. 14-nik ukioqarluni 1. juli 1965-imi aamaruutissarsiorfiusimasumi Qullissani KGH-mi sulilersimavoq. KGH-mi Qullissani sulisimavoq 1972-imi Ilulissanut nuunnissami tungaanut. Ilulissani tikikkami aqaguani KGH-p pisiniarfiani sulilersimavoq. 1986-imi-lu KNI-p quersuani sulilersimavoq, tassalu maannamut soraarninngornissami tungaanut tassani
aalajaalluni sulisimalluni.

Lars Clasen KNI-mi suleqatimi sullittakkamilu akornani nuannarineqarlunilu tatigineqarpoq.
Inussiarnersuuvoq, suliffimminut ilumoorluni aalajaatsuullunilu, pisisartullu qitiutillugit sulisuulluni.

KNI-mi suleqataa KNI-p quersuani Nuummiittumi siammarterinermut pisortaq Steen M. Jensen Lars Clasen pillugu ima oqarpoq:

“Larsi sulisuuvoq nuannaartoq. Naapinneri tamaasa ukiorpassuarni kingullerni, truckini issialluni qunguju-laarluni kiffartuutassaminik kiffartuussisoq takusarsimavara, aasaq manna napparsimalernissi tikillugu su-liuartuulluni, KNI-iillu assakaasuinik assakaatitseqataalluni – tassami oqartariaqarpoq Larsi tassaasoq pisi-sartunik qitiutitsisoq. Ikiuukkumatuujuvoq nuannaartuullunilu. Taamatut eqqaamavara.”

KNI-mi pisortaanerup Larsi KGH-mi KNI-milu ukiorpassuarni sulisimanera pillugu qujassuteqarfigaa,
atorfeqarsimaneranut uppernarsaammik, gratiale-mik takussutissaanillu allanik tunissuteqarfigalugu.

“Tamaangali killinngilanga. Tassa aamma inuit akuttoqaat Lars Clasen-itulli aalajaallutik ukiorpassuarni suliffeqarfimmi ataatsimi atasuinnarmik atorfeqartartut. Taamaattumillu pisortat suliffeqarfiutaanni, tassa suliffeqarfissuarni siornatigut naalagaaffiup suliffeqarfiutigisimasaanni, maannakkullu Namminersorlutik Oqartussanit pigineqarlutik ingerlasuni sulisuusut pineqartarnerattulli, ataqqinartorsuup Dronning Margrethe Aappaata nersornaasiuttagaanik Fortjenstmedalje-mik Sølv-iusumik naalannaaserneqartarput, tamanna eqqumaffigineqarsimappat. Asasara Lars Clasen, uagullu KNI-mi taamatut naalannaaserneqarlutit sakiammiulerneqarnissat, ataqqinartorsuup nersornaasiuttagaanik ataqqinaaserneqarnissat isumageqqullugu piumaffigineqarsimavugut; tamannalu suliassaq ullumikkut naammassissavarput, KNI A/S-imi siulersuisuni siulittaasutta Niels Thomsen-ip saqqarmiussat sakissannut atitissammagu.” Pisortaaneq Peter Grønvold Samuelsen ilaatigut oqaaseqarpoq.

Taava KNI-p siulittaasuata Niels Thomsen-ip nersornaat Lars Clasen-ip sakiaanut ikkuppaa, ilaqutaasullu pilluaqquutigalugit nuliaasoq naasunik kusanartunik tunillugu.

Lars Clasen, nulia aamma Niels Thomsen.