Oqaaseqaat

Ukiaanerani ataatsimiinneq ammarlugu Naalakkersuisut siulittaasuata oqalugiaataa aallaavigalugu oqallinneq ulloq 29. september 2019 Inatsisartuni ingerlanneqarpoq. Per Rosing Petersen, Partii Naleraq, oqalugiaammut atatillugu saqqummiinermini ilaatigut ima aperivoq: 

Taama nassuiaateqariarlunga immitsinnut aperisariaqarpugut, una inuiaqatigiit pigisaat, inuiaqatigiinnik kiffartuussinissamik siunertaqartoq piginneqatigiiffik, sumut nioqqutissat kalaallinut tunisartagassani aasarpai? Sooq nioqqutissaq, pitsaassuseq innarlinngiivillugu affaa ataatingaatsiarlugu akilik EU iluinnaani aasinnaaguniuk, sooq inuiaqatigiit suliffeqarfiup pigisaata inuiaqatigiit kiffartuussani akisunersiuutissavai?

Apeqqutigisaanut atatillugu KNI A/S imatut erseqqissaassaaq.

Nioqqutissat nunatsinni tuniniagassat Danmarkip saniatigut nunani allani amerlasuuni pisiarisarpavut. Nioqqutissat Pitsaasut-mik nalunaaqutsikkat Danmarkip avataani nunani assigiinngitsuni 12-ni pisiarineqartarput nioqqutissallu taakku kalaallisut oqaasertalersugaapput sumillu akoqarnerat aamma kalaallisut allagartalersugaalluni. Tamannarpiarlu pissutaavoq suliffeqarfik Danmarkimiittoq Senobis KNI A/S-ip suleqatigalugu suliffeqarfimmik pilersitsigatta taamaasilluta nioqqutissanik niuerfimmut appakaassinnaaleratta taamalu akikinnerusumik nioqqutissanik pisiniarsinnaalerluta. 

Nunatsinni innuttaasut amerlassusaat eqqaamassallugu pingaaruteqarpoq. Nioqqutissat avataani pisiarisartakkagut pisinianut 23.000-nut naatsorsuussaapput, tassalu Danmarkimi pisiniarfiup Føtex-ip ataatsip pisiniartorisartagaanit ikinneralaarsuit. Nioqqutissanik piniarnermi akit appasissappata piumasaqaataasarpoq nioqqutissanik amerlasuunik bestiiliinissaq, taamaattumik nioqqutissanik tuniniaaqqittartunik suleqateqarnissaq KNI A/S-imut avaqqunneqarsinnaanngilaq.  

Nunatsinni inuit nuna tamaat siammarsimallutik najugaqarput. Amerlasuunillu pisiniarsimatilluta taakku poortoqqinneqartariaqartarput pisiniarfiit amerlasuut paletsikkaanik tigusisinnaanngimmata. Poortueqqinneq nioqqutissap akiata qaavanut ilanngunneqartarput taamalu nioqqutissaq akikinnerulersinnaanani.

Akit qaffasinnerulertarnerannut patsisaasut ilagaat nalunaaqutsersuisussaatitaanermik Nunatsinni inatsit atuuttoq. Nioqqutissanik nunani allani pisisimatilluta taakku kalaallisut, qallunaatut qallunaalluunniit oqaasiinut eqqaanartunik allagartalersugaaneq ajorput soorlu nioqqutissat atii nuna allamiut oqaasii atorlugit allataasartut. Nalunaaqutsersuinermut aningaasartuutit nioqqutissat akiinut ilanngunneqartarput taamalu aki qaffattarluni.

Akinut nunani allani atorneqartunut naapertuuttumik akilinnik nioqqutissanik pisisartutta pisinissaminnut periarfissaqarnissaat KNI A/S-ip siunertariuarpaa, susassaqarfittali avataaniittut soorlu assartuinermut, akitsuutinut allanullu tunngasut aningaasartuutit akit qaffasinnerulernerannut patsisaaqataasarput.