Ataqqinartorsuup Dronningip nersornaasiuttagaanik Fortjenstmedalje-mik sølviusumik saqqarmiuliineq

Ukiorpassuarni KGH/KNI-mi suleqataalluartut Otto Møller, Uummannaq, aamma Boye Sigurdsen, Ikerasak, ataasinngorneq 29. juni 2015 Uummannami nalliuttorsiualaarnermi saqqarmiulerneqarput

Saqqarmiuliineq nalliuttorsiorpalaartumik ingerlanneqarpoq Uummannami nakorsap illorsuatoqarsuani alianaatsumi, saqqarmiulerneqartut ilaqutarpassuinik suleqataanillu, kiisalu KNI-p siuttuinit arlalinnit peqataaffigineqartumik.

Fortjenstmedaljemik saqqarmiuliineq KNI-mi pisortaanermit Peter Grønvold Samuelsenimit ingerlanneqarpoq, saqqarmiulerneqartullu tassaapput:

• Otto Møller, 61-nik ukiulik, Uummannaq, ukiuni 44-inngulersuni KGH/KNI-mi atorfilik.
• Boye Sigurdsen, 57-nik ukiulik, Ikerasak, ukiuni 42-ni KGH/KNI-mi atorfilik.

KNI-p pisortaanera Peter Grønvold Samuelsen saqqarmiuliinermini ilaatigut ima oqaaseqarpoq:

”Unnuk manna maani Uummannami illorsuatoqannguami alutornaqisumi katersuuppugut suleqatigut marluk ataqqinartorsuup Dronning Margrethe-p aappaata naalagaaffiup suliffeqarfiutaani ukiorpassuarni sulisimasunut nersornaasiuttagaanik Fortjenstmedaljemik sølviusumik saqqarmiulerniarlugit.

Nunatsinni suliffeqarfinnut anginerpaanut inuiaqatigiinnilu pingaaruteqarluartunut KNI ilaavoq, ulluinnarni inuppassuit inuuniarnermi pisariaqartitaannik pilersuisussaatitaalluni. KNI-p sulisoqarnermi tungaatigut ilisarnaataasa ilagilluarpaat sulisut pikkorissut, suliffimminni aalajaatsut, tunniusimasut ilumoortullu, sulisorisaramigit.

Otto Møller aamma Boye Sigurdsen ilaquttasilu tamassi maanga qamannga pisumit tikilluaritsi. Naatsorsorsinnaavara piffissami matumanerpiaq eqqaamasaqartusi, siulisi ilissinnit perortitsisimasut, qanigisasi allat unnuk manna maaneeqatigisinnaanngisagut, aamma sineriassuarmi suleqatigisimasarpassuasi, qularnanngilaq eqqaamassagisi. Inuit ilissinnut immikkut malunnaateqarsimasut eqqarsaatissinniitikkussigit tupigissanngilara.” 

Otto Møller nulialu.

”Otto Møller – Nuugaatsiami 14. marts 1954-imi inunngorpoq. 1971-imi Uummannami taamanikkut KGH-p pisiniarfitoqaani sulilerpoq, taamanikkut 17-leeqqammerluni, tassalu maannamut ukiuni 44-ni sulisimalluni. Pisiniarfimmiuusarlunilu quersualerisuunerusarsimavoq. Suliamut atatillugu pikkorissarnerit assigiinngitsut peqataaffigisarsimavai.

Suliffigisami ataatsimi ukiorpassuarni aalajaalluni taamatut sulisimanerup takutippaa inuup atorfimminut tunniusimalluni inuiaqatigiinni sullisseqataasimanera.

Otto  ukiorpassuarni  sulisuunerni  misilittagarpassuarpit  saniatigut  Uummannami  nunaqarfiinilu  tamani  annertuumik  ilisarisimaneqalersimavutit,  suliassanut  apeqqutinullu  imaalitsiaannaq  nalorsarfigisinnaanngisarnik  ilisimasaqarlualersimallutit, ulloq manna tikillugu KNI-mut sullitaanullu iluaqutaasumik.”

Boye Sigurdsen nulialu.

“Boye Sigurdsen 1973-imi KGH-mi sulileqqaarsimavoq 15-16 miss. ukioqarluni. Buujuk aamma suliaminut atatillugu pikkorissartarsimavoq, nalunngilaralu aamma suliffeqarfimmini sulisut sinniisaattut ukiorpassuarni ukkassaqartarsimasoq.

Buujuk meeraallutilli Uummannatsiami najugaqarallarassili Ikerasammut qallunniartarsimavusi, taamanikkullu niuertoruseq pisiniarfimmi sulisoq takugaangakku nuannaartorisarsimavat, sunaaffalumi 1967-imi Ikerasammut nooreernissinni tassannga KGH-mut suliartoqqusaajumaarsimallutit. Buujullu sulisartuuneq nuannarigamiuk, taamanikkut arpaannaq suliartortarsimanini eqqaamasaqarfigalugu unnersiorpoq.

Buujuk, nunaqarfimmiut ullumikkullu oqartoqartarnera issuaannarlugu sulisartuinnaallu sulilluarsimanerat, inuiaqatigiinnilu sullisseqataalluarsimanerat ataqqinartorsuarmit maluginiarneqarlutik imatut maluginiarneqartarnerat akuttoqaaq. Sinnerlutit, ilaquttatillu sinnerlugit usorsisimaarpunga ataqqinartorsuup nersornaasiuttagaanik sakissannut akkiussissagama.”

Tulluussimaarpugut

“Suliffeqarfissuatsinnut KNI-mut tulluusimaarnartuuvoq suleqateqaratta ilissitut ittunik, ilissitut tunniusimallutik ukiorpassuarni KGH-p KNI-p inuiaqatigiinni kiffartuussinerani qulakkeerinninniaqataajuartunik.

Marluullutik ilaquttasilu tamaasa ilanngullugit qamannga pisumit pilluaritsi.”