KNI sinneqartooruteqaqqippoq – angusat pitsanngoriartinneqarput

KNI akileraarutit sioqqullugit DKK 86 mio.-nik sinneqartoorpoq taamaalillunilu ukiumi naatsorsuuteqarfiusumi 2013/14-imi, aningaasatigut pitsaasumik ingerlatsineq aallartinneqartoq nangillugu, ukiumi naatsorsuuteqarfiusumi 2014/15-imi sinneqartoorut – ukiuni kingullerni qulini – aatsaat taama pitsaatigisoq anguneqarpoq. Pingaartumik nioqqutissanik pilersuinermi ukiut siuliinut sanilliullugu angusatigut siuariarneqarluarpoq.

Akileraarutit sioqqullugit DKK 86 mio.-nik sinneqartoornermigut KNI-p aningaasaqarnini patajaalli-sarpaa, angusatigullu iluarisimaarnartumik pitsanngoriartitsinini nangillugu. Tamanna pivoq massa aningaasarsiornikkut periarfissat ilungersunartorsiorfiugaluartut, tassami inoqarfinni nioqqutissa-nik pilersuisussaatitaaffigisani – nunaqarfinni illoqarfinnilu mikinerusuni – innuttaasut illoqarfinnut anginerusunut nutsernerat annertoorujussuugaluartoq.

Akileraarutit sioqqullugit DKK 86 mio.-nik sinneqartoorutit ukiup siulianut sanilliullugit DKK 24 mio.-nik pitsanngoriartitsineruvoq, tamannalu naammagisimaarnarluinnartuuvoq.

Sinneqartoorutinik pitsanngoriartitsisoqarpoq suliniummik ”KNI 2016”-ip tungaanut sukumiisorujussuarmik ukkassisoqarneratigut. Tamatuma saniatigut aningaasartuutinik aqutsilluarneq suleriaatsinillu pitsanngorsaaneq pissutaaqataapput.

Suliffeqarfissuup immikkoortuani Polaroil-imi ikummatissamik imerpalasumik pilersuinikkut angusat DKK 62 mio.-iupput, ukiup siuliani angusat DKK 54 mio.-iusimasut.

Nioqqutissanik pilersuineq DKK 22 mio.-nik angusaqarfiuvoq, ukiup siuliani angusat DKK 3 mio.-iu-simagaluartut.

KNI-p pisiniarfiutai, quersui ikummatissaasiviilu ukioqqortusinikuupput, taamaattumillu tamakku aserfallatsaaliniarlugit aningaasarpassuit atorneqartarput, tamakkulu namminersorlutik suliffiutilinnut aamma suliassaqartitsipput. Ukiumi naatsorsuuteqarfiusumi 2014/15-imi DKK 70 mio.-it sanaartornermut aserfallatsaaliuinermullu atorneqarsimapput. Ukiuni kingullerni tallimani KNI sanaartornermut DKK 589 mio.-it atorsimavai. Ukiuni tulliuttuni ukiumut DKK 85 mio.-it miss. sanaartornermut atorneqartassapput.

KNI-p piginnittuanik, Namminersorlutik Oqartussanik, isumaqatigiissuteqarnikkut ukiumi sinneqartoorutit ilaannit DKK 30 mio.-nik agguagarsisitsisoqarnissaa immikkoortitsiffigineqarpoq.

Tamakku qaavisigut ukiumi naatsorsuuteqarfiusumi 2014715 KNI sulisut akissarsiaannit DKK 70 mio.-nik akileraarutitigut akiliuteqarsimavoq, kiisalu DKK 8 mio.-nik suliffeqarfissuup akileraarutissaa akilersimallugu.

Ukiumi naatsorsuuteqarfiusumi aamma KNI-p inuiaqatigiinni pisussaaffeqarnini naapertorlugu – inuiaqatigiinni ineriartortitseqataanini nangillugu ingerlateqqippaa.

Ukiumi naatsorsuuteqarfiusumi 2014/15-ip naanerani KNI 912-nik sulisoqarpoq, imaluunniit ukioq kaajallallugu atorfiit 742. Taamaalilluni KNI Nunatsinni suliffissaqartitsisunut anginerpaanut ilaavoq. Sulisut piginnaanngorsarniarlugit suliniut Taqqissuut-mik taaneqartoq 2014-ip upernaakkuani aallarnisarneqartoq maanna ineriartortinneqaleruttorpoq, suliffeqarfissuup sulisuisa piginnaanngorsarneqarnissaannik imaqartoq.

KNI A/S tamakkerlugu ilinniartut maanna 55-upput. Taakku ilaasa 15-t ilinniarnertik ukiormanna aasap qaammataani naammassissavaat, allat ilinniartut nutaat 19-t ilinniarnertik suliffeqarfissuarmi aallartissallugu. Ilinniartut naammassereernermik kingorna KNI A/S-imi sulilertartut arlaqarput.