Ataqqinartorsuup Dronning Margrethe II-p nersornaasiuttagaanik Uummannami saqqarmiuliineq

Elise Petersen ukiuni 42-nngulersuni KGH / KNI-Pilersuisumilu ataannartumik sulisimsoq saqqarmiulerneqarpoq ulloq 21.Februar 2015 nal: 10:00 Uummannap katersugaasiviata immikkoortortaani “Nakorsap illorsuatoqaani”

Ulloq Uummannarmiunut pingaarutilik

21. februar pinngortitarsuup tupinnaannartumik alianaassuseqarluni anoreqarani qilak tungutsorik nuiaqanngivissoq allaaqqissuaq nal:10:00 ukiuni 42-nngulersuni KGH / KNI Pilersuisumilu ataannartumik sulisoq Elise Petersen ataqqinartorsuup Dronning Margrethe nersornaat saqqarmiuliuttagaa sølv-iusoq tunniunneqarpoq.

Qaaqqusat Elise-p uia Niels Anthon (Aqqaluk) taakkualu ilaqutai tamarmik katersuussimapput Uummannami katersugaasiviup immikkoortortaani ”Nakorsap illorsuatoqaani”.

Nunap immikkoortuani Pilersuisoq a/s-imi tuniniaanermut pisortaq najuuttunut tikilluaqqusereermat Uummannami erinarsoqatigiit ”Erinaq” akunniliillutik erinarsorput tusarneqisumik atorlugu ”Sinniisiga asassavakkit.” erniarsoqatigiillu namminneq aamma tunissutitut tusartitassartik piareersimatitaqarlutik tusarnerluinnartumik akunniliillutik erinarsorlutik.

Tuniniaanermut pisortaq oqaaseqaateqarpoq, Elise-p ukiuni 42-lersuni sulisimernini assigiinngitsorpassuit aqqusaartarsimasai eqikkarlugit pingaarnersiorlugillu taakkartorlugit, ullormi tassani qaaqqusanut ilaapput KNR-tv-imut ilanngutassiisartoq Samuel Kleemann ”Nunatsinnit” aallakaatitassiorluni najuuppoq.

Nakorsap illorsuatoqaani ilasseqatigiinnermi kusanarluinnartumik aaqqissuunneqarsimasumi sutugassaqarlunilu imeruersaatinik kaffe/Te kaagillu sassaalliutigineqarput.

Maluginiarneqasinnaavoq ullorsiortoq qanigisaasalu pingaartorsiornerat, minnerunngittumillu nunaqqataasut pingaartorsiuutigineqatoq maluginiagassaavoq ukiorpassuarni tamanna Uummannami nalaanneqarsimanngittutut oqaatigineqarsinnaammat, Elise tassaavoq suleqat aalajaatsoq piffissamillu asiutitsiuvitsoq suleqatinut tamanut pitsaasumik takutitsisoq maligassiusuuneralu pillugu uummammit pisumik qutsavigaarput, ilaqutai tamaasa qutsavigalugillu pilluaqquagut.

Oqalugiaat

Tikilluaqqusineq.

Suleqaterput Elise, uia Aqqaluk, qanigisai suleqatigullu tamassi maani najuuttusi tikilluaritsi.

Nuannaarutigaara ullumikkut ulloq najuussinnaagama taamatullu suliffeqarfissuaq KNI A/S Pilersuisorlu sinnerlugit pisumi naliginnaanngittumi pingaarutilimmilu oqaaseqarsinnaagama.

Maannga katersuuppugut immikkuullarissumik pingaarutilimmik naliginnaanngilluinnartumillu pisoqartussaammat tamannalu pissusissamisoorluinnarpoq, pisortat suliffeqarfiutaanni ataannartumik ukiut 40-it angullugit sinnerlugilluunniit sulisimasunut ataqqinnilluni qujaniarlunilu immikkut malunnartitsisoqartarmat. Saqqarmiuliineq.

Oqaluttuarisaanermi innuutaasut akornanni naliginnaasuunngilaq ataqqinartorsuup Dronning Margrethe-p aappaata saqqarmiuliuttaagaanik (Sølv-iusumik) saqqarmiuliisoqartarnera tamannalu qangaaniilli atuussimavoq nunasiaataanerup nalaani KGH-qarallarmalli, pissusissamisoorporlu nunarput namminersornerulermat kingornalu namminersorneq eqqunneqaraluarmat naalagaaffeqatigiinnerup aqqani periuseq suli ingerlanneqartarmat aamma nuannaarutissaavoq.

Ullumikkullu ataqqinartorsuup Dronning Margrethe aappaata saqqarmiuliuttagaanik tunissuteqarfigineqartussaq ukioq 1973 KGH-mi sulilersimavoq taamanikkut inuusuttuaraavoq, pisiniarfimmilu sulilerami piffissap ingerlanerani misilittakkat amerliartuinnavissimapput, taamaattumillu ittorisaminniit aperineqarsimavoq ilinniartunngorsinnaannersoq, tamannalu akuersaarlugu ilinnialernissani aallartissimavaa, ilinniarnerup ingerlanerani KGH-p pisiniarfiini immikkoortortaqarfiit tamakkerlugit aqqusaartarsimavai, taamaattumillu niuertarfimmi sulisuussagaanni pikkoriffigineqartariaqartut aammalu ilikkarneqarsimasariaqartutut piumasaqaatit qaratsaminut pulatilluarsimallugit ilinniarninilu naammassilluarsimallugu.

Kalaallillu inuiaat akornanni inuk “Ataaseq” immikkut maluginiarneqartariaqartoq inuiaqatigiinnilu sullisseqataasussatut taamanikkut akisussaaffimmik tunineqartariaqarsimavoq inuk pikkorissoq tatiginartorlu tassaavoq illit Elise, tatigineqarnerit akisussaaqataanerlu periarfissiissutaasoq taamanikkut tigulluarsimavat, ileqqoraallu piffissamik ataqqinninneq, aammalu anguniakkamik pingaartitsineq illit ilisarnaativit ilagilluinnarpaat suliffeqarfimmik piginnittut suliffeqarfimmilu qullersat anguniagassatut siunniussaannik paasinnillutillu pimoorussillutit anguniagaqartarnerit aammalu sorpassuartigut angusaqartarnikkut inuiaqatigiinni suliffeqarfiup aningaasarsiornerani kivitseqataasarsimallutit. taamaattumik ukiut 42-nngulersut ingerlareerneranni Elise oqaatigineqarsinnaalersimavutit oqaaseq “Niuerneq aammalu niuernerpalaartumik ingerlatsineq” qanoq isumaqarneranik paasinnittoq misilittagalillu taamaattumillu niuertutut piginnaanilittut….. oqaatigineqarsinnaalluarlutit. Tamanna suleqaterpassuarnit qullersaasuniillu ilisarisimaneqaatigivat suleqatitullu qanilaartuunerit tamatta nuannaarutigisarparput.

Ukiut 42-it ingerlaneranni sulinerit tamaat oqaluttuarisinnaanngilara, tamanna illit kisivit oqaluttuarisinnaavat.

Pisiniarfigissaallaqqissuugavit suliarisimasarpassuarpit ilagivaat arlalitsigut nunaqarfinnut aallartitaasarlutit pisiniarfigissaajartornerit ajunngilluinnartunillu naammassisarlugit, arlaqarput suliassat pingaarutillit pineqartillugit suleqaternit maannakkut pisiniarfiit pisortaqaterniit illit ilisimasalittut ikiortigilluarneqartarnitit aammalu saaffigineqartuartarnitit suli maannakkumut.

Sulisoq aalajaattoq suliffimmullu tunniusimasoq Elise, taamaatut naakkaluartumik oqaaseqarlunga uummammit pisumik suliffeqarfipput sinnerlugu qutsavigaakkit, unalu saqqarmioq “Ataqqinartorsuup saqqarmiuliuttagaa” ilinnut tunniunneqalersoq pitinnagu aammaarlunga oqaatigerusuppara illit pisortat suliffeqarfiutaanni maligassiuilluarlutit aalajaallutillu suliuarnerit pillugu inuiaqatigiit akornanni amerlanngittut ilagivaatsit nersornaammik taama ittumik tunineqarsinnaalersimasoq, taamatut pineqarnerit asuliinnaanngilaq tassaavormi illit tamanna inuttut sulisutullu ataqqinaatit.

Una pisoq maani Uummannami KGH-mi KNI-mi Pilersuisumilu pisiniarfimmi sulisuni taamatut saqqarmiuliisarneq qaqutiguunnguatsiarpoq, uangalu nammineerlunga tusagaqarsimanangalu suli takusaqarsimanngilanga taamatut pisoqarneranik, taamaattumik isumaqarluinnarpunga Ulloq tamatsinnut angisuujusoq ilami Uummannap illoqarfittut aamma pisuussutaatut uanga taarusuppara.

Elise, qularutiginngilara eqqarsaatitit misigissutsillu nuannaarnerup pilersitai isitta takusinnaanngisaannut tamanut tamaannga angalaartutut ittut immaqa qaniginerpaasarnut ilaquttarnullu aammalu sulinermi ilinnut pingaaruteqarluatunut suleqatigisimasarpassuarnut sammitikkitit eqqoriarsinnaavara.

Manna iluatsillugu Elise-p sulinermini ingerlaqatigisai tassalu suleqatai minnerunngittumillu Elise-p Uia Aqqaluk, Ernersi ilaqutaalu aammalu ilaquttasi tamaasa Pilersuisoq a/s sinnerlugu qujaffigaassi, ukiorpassuarni tapersersuisimanersi Elise-llu suliffimmini pisussaaffippassuinut paasinnilluarsimanissigut nukissamik tunisisarsimassasusi qularutiginngilara.

Taamaattumik inuuneq ingerlammat ullullu ingerlaqqittuartussaammata siunissamik ajunngittunik tamanik kissaallusi ulloq manna tamassinnut pingaaruteqarluinnartoq nuannersumik atorluarumaarissi aamma naalluarumaarisi kissaappassi.