Angusaqarluarnerpaamut kajumissaasiinneq

Ilimmarfimmi ilinniakkanik assigiinngitsuni iliniartut bachelorinngortut kandidatinngortullu tallimanngorneq 27. februar 2015 ilinniarnermut uppernarsaatinik tunineqarnerannut atatillugu KNI A/S-ip siulersuisuni ilaasortaq Julia Pars suliffeqarfissuaq sinnerlugu checkimik 5.000 kroninik aningaasartalimmik tunniussivoq.

Tunineqartoq tassaavoq Susanne Lea Q Andersen, agguaqatigiissillugu qaffasinnerpaamik, tassalu 11,4-mik angusaqartoq. Susanne Lea Q Andersen inunnik isumaginninnermut siunnersortitut professionsbachelorimut naammassivoq.

Julia Pars ilaatigut ima oqarpoq:
- KNI A/S, suliffeqarfissuit Namminersorlutik Oqartussat pigisaasa annerpaartaannut ilaavoq, taamaasillunilu nunatsinni suliffeqarfissuit annerpaartaasa ilaat sinnerlugu, ilinniakkassinnik naammassinninnissinnik pilluaqqusinnaagassi assut nuannaarutigaara. Ilinniagaqarneq tassaavoq inuiaqatigiinni ineriartortuni nukiit pingaarnerpaasut ilaat, tamannarpiarlu pissutigalugu ilinniagaqarnissamik ilinniagaqaqqinnissamillu kaammattuiuarnissaq pingaaruteqartutut isigaarput.