Nunatta Kujataani savaatilik naatsiianillu naatitsisartoq KNI Engrosimiit tikerneqarpoq

Neqi a/s-ip nioqqutissiarisartagaasa tunisaalluarnerunissaat anguniarlugu Neqi a/s-imillu suleqateqarnermut atatillugu KNI Engros Neqi a/s peqatigalugu Nunatta Kujataani amerlanerpaanik naatsiianik naatitsisartoq Ferdinand Egede tikeraarpaat.

Savaateqarfik Sermilimmi Eqaluit Iluanniittoq Ferdinandip angutaata 1958-imi savaateqarfiliarisimavaa, kingorna savaateqarfik Ferdinandip qatanngunnilu ingerlatilerpaat ullumikkullu Ferdinandip nulii ernitillu marluk peqatigalugit savaateqartuupput, erneri savaateqarnermik ingerlatsisut angutaat Ferdinand naatsiianik naatitsinermik ingerlataqarluni.

Ukiuni kingullerni marlunni Neqi a/s-ip aamma KNI Engros-ip Nunatta Kujataani naatsiianik naatitsisarnermi inerisaarneq naatitsisartunik suleqateqarnikkut annertuumik siuarsaaqataaffiginikuuaat, taama ililluni naatsiianik pitsaalluinnartunik pisisartut pisiniarfinni pisiassaqartinnissaat qulakkeerniarneqarluni kiisalu naatsiiat Nunatsinni naatinneqartartut aamma tunineqartartut ukkanneqarnerunissaat anguniarneqarluni.

Pitsanngorsaanermut atatillugu ukiuni kingullerni marlunni naatsiianik poortueriaaseq aamma inerisarneqarnikuuvoq, ullumikkullu naatsiiat puussianut silaannaqartitsinerusunut poortorneqartalernikuupput minnerunngitsumillu siusinnerusukkut poortuisarnermi scantainerinut naatsiianik allinnguutsitsisarluni poortuisarneq misissornikuullutigu, taamatummi poortueriaaseqarnermi alliit naqigullugit singartinneqartut amerlasarsimapput, maannakkullu poortueriaatsip allanngortinneratigut naatsiiat puussiat qulikkaarlugit karsinut qorsunnut poorlugit qaleriiaarneqartarlermata alliit singartinneqassaarnikuupput.

Engrosimi pisortaq Jens Bang oqaluttuarpoq:

Tikeraarnitsinni pingaarnertut siunertaraarput naatsiiat qallorneqarneriniit Neqimut apuunneqarlutik poortorneqarnissaannut ingerlanneqartarnerisa pitsanngorsaavigineqarnissaa.

Siusinnerusukkut nalaattarnikuuarput naatsiiaat assartorneqarnerminni aqqutaani seqinertarineqartarnerat, taamalu ilillutik piffissap ingerlanerani naatsiiat qorsunngoriartortarlutik.

Taamaattumik naatsiiat qanoq uninngatinneqartarnissaannut tunngatillugu Ferdinand oqaloqatigilluartorujussuuarput kiisalu Narsamut assartuisarnerup siunissami qanoq pitsanngorsaavigineqarsinnaanera isumassarsioqatigiiffigalutigu, taamalu ililluta aappaagu naatsiianik naatitsinissamut suliniutissatsinnik eqqarsaateqalereerluta, Jens naggasiivoq.

Ukioq manna naatsiiat naatinneqartut assut kusanarput, naatsiiallu siulliit pisiniarfinnut nassiunneqareernikuupput.