KNI Engrosip Sisimiuni immikkoortortaa nutarsarpoq

KNI Engrosip Sisimiuni immikkoortortaa nutarterneqaqqammerpoq, sumiiffimmiillu aallaaveqartumik pisiniarfeqarnissaq immikkut ukkatarineqarnikuuvoq.

Assilissat kalaalerpaluttut kusanartut, KNI-p ilisarnaatigilluagai, torersaarnerlu.
Maluginiakkat tamakku ilagaat, KNI Engrosip Sisimiuni immikkoortortaa sissami inissisimasoq, iseraanni.
KNI-mi naleqartitat ilaat, ’Kalaallit Inuunerat Ilorleq’, tunngavigalugu pisiniarfik kusanartumik takujuminartumillu ilusilersorneqarnikuuvoq. Ilusilersukkallu taakku Pilersuisup pisiniarfiini nutarsakkani aamma nassaassaapput.

KNI Engros, suliffeqarfiit allat assigalugit, pisiniarfiuvoq suliffeqarfinnut allanut tuniniaasoq. Tassa imaappoq, igaffissuit, kantiinat, peqatigiiffiit, pisiniarfiit piniartulluunniit, CVR-imik akuersissutillit, Engrosimut pisiniarsinnaapput.

Engrosimi arlalikkaanik pisiniartoqarsinnaasarpoq, soorlu nerisassanik, atortussanik, tupanik immiaaqqanillu.

- Immikkoortortagut sumiiffinniit aallaaveqartumik ingerlakkusuppagut, sumiiffinni pissutsinut tulluarsarlugit. Sisimiuni immikkoortutta nutarsarneratigut pisiniarfittaarpugut kusanartumik KNI-p naleqartitaanut tulluarsakkamik, najukkamilu pisiniarnissaq pingaartarmat qularinngilarput pisiniarfik nutaaq tigulluarneqarumaartoq, KNI Engrosip pisortaa Jens Bang oqaluttuarpoq.

- Taassuma saniatigut nioqqutissanik allanik perusukkaanni, soorlu neqit akikinnerit imaluunniit pitsaanerit, uagutsinnut aamma saaffigiinnittoqarsinnaavoq, Engrossi peqatigalugu tikisinneqarsinnaammata, Jens Bang oqarpoq.

Pisiniarfittaaq aalisartunut piniartunullu aamma immikkoortortaqarpoq.

Pisiniarfimmut nutaamut pingaarnertut suliaqartut, saamimmiit: Siverth Hosiassen (Pisisa), Jan-Kristian Olsen (tuniniaanermut siunnersorti, Qeqqa), Jens Bang (Engrosimi pisortaq), Thomas Hjaltalin Jensen (immikkoortortami pisortaq, (KNI Engros Sisimiut) Arkalo Fenckerilu (Quersuarmi pisortaq).

KNI Engrosi sissami umiarsualiviup eqqaani inissisimavoq, isaariaalu sissami sammisumilluni. Pisiniarfik ullut tamaasa nal. 8-16 ammasarpoq.