FN-ip anguniagaata 17-iusuni KNI-p anguniagai sisamat

Nunarsuaq tamakkerlugu anguniakkami nr. 3-mi anguniarneqarpoq peqqissuunissap atugarissaarnerullu qulakkeerneqarnissaa aammali ukioqatigiinngitsunut tamanut inuulluarneq siuarsassallugu.

Nerisassanik inuussutissanik amerlasuutigut pisiniarfituaasaratta pisisartut peqqissuunissaannut annertuumik akisussaaffeqarpugut, taamaattumik pisisartutta peqqinnartumik inuuneqarnissaat nerisaqarnissaallu assut pingaartipparput.

Sulisut peqqissuunissaat atugarissaarnissaallu aamma pingaartilluinnarparput ukiorlu tamaat timimik aalatitsinissaat aaqqissuussiffigisarlutigu kiisalu sulinerminni atugarissaarlutik pitsaasumik avatangiiseqaraangamik angusarissaartitsisarmata katersuutsittarlutigit allanillu atorluarsinnaasaannik neqeroorfigisarlutigit.

Nunarsuaq tamakkerlugu anguniakkami nr. 4-mi anguniarneqarpoq ilinniagaqarsinnaanerup pitsaasuunissaa kikkullu tamarmik ilinniagaqarsinnaanerannut periarfissanik pilersitsinissaq.

Sulisuvut tassaapput isumalluutit pingaarnersaat. Sulisummi suliaqarnerisigut pitsaassuseq naammassisaqarsinnaassuserlu aatsaat pilersissinnaavavut, taamaattumik sulisut piginnaasaasa qaffassartuarneqarnissaat aaqqissuussaasumik sulissutigiuarparput, tamannalu angussavarput sulisutsinnik ineriartortitsinitsigut ilinniartitsinitsigullu, kisianni soorunami aamma nutaanik atorfinitsitsisarnitsigut.

Kalaallit inuusuttorpassuit ilinniagaqarnissaminnik aallartitsineq ajorput. Kalaallit amerlanerit ilinniagaqarnissaannut KNI suleqataavoq, taamalu ililluni inuiaqatigiinni nukittorsaanissaq tunniussaqaqataaffigisarlugu. Suliffeqarfitsinni sulisussarsiortilluta sumiiffinneersunik sulilersitsisarnissarput pingaartittuaannarparput, taamaattumik piginnaanernik ineriartortitsinissatsinnik aaqqissuussinikuuvugut taallutigu Taqqissuut. Nammineerluta sulisutta piginnaanerisa qaffarsarneqarnissaat pingaartilluinnagaraarput, taamammi iliornitsigut aalajaannerusunik qularnaannerusunillu sulisussaqartittarpaatigut.

Nunarsuaq tamakkerlugu anguniakkami nr. 12-imi anguniarneqarpoq piujuaannartitsisumik atuinissaq tunisassioriaaseqarnissarlu.

KNI-p anguniagaraa suliatsinni tamani piujuartitsilluta eqqarsartarnissarput.

Akisussaassuseqarnerusumik atuinitsigut avatangiisitsinnik sunniutikinnerunissaq anguniarlugu piujuartitsinissamut periusissiorpugut - aatsaammi taama iliornitsigut siunissami piujuartitsinissaq angusinnaavarput. Igitassanngortitsisarnerput minnerpaaffianiitissavarput, igitattakkavullu annertuut pinngortitap nammineq arrortissinnaassavai imaluunniit atoqqinneqarsinnaassallutik.

Nunarsuaq tamakkerlugu anguniakkami nr. 17-imi anguniarneqarpoq nunarsuarmi tamarmi piujuaannartitsineq eqqarsaatigalugu ineriartornermi suleqatigiinnerup pitsanngorsarneqarnissaa taamatullu anguniakkat angunissaannut sakkussat nukittorsarnissaat.